Col 4 | BEF | STEP | To lenali kaba bo nehanamagita kele kele panatini enele'mo hetofana hite to bebe sose hapa hite enele'mo bati hilo. Lenali Kaba Botini mone kokulumalugu nohinamofihi lenekesu meheno.

Colossians 4

1 To lenali kaba bo nehanamagita kele kele panatini enele'mo hetofana hite to bebe sose hapa hite enele'mo bati hilo. Lenali Kaba Botini mone kokulumalugu nohinamofihi lenekesu meheno.

Kehelina ka yabe

2 To kosele'i mehose amuya melete Hu'mamofitoga fokehi nelite nunumu hite Hu'mamofihi loka holata nehite minalo. 3 To lali kumu luto loka nehete Hu'mau ai ka lamana'a suguna ka'a Yesu Kilisito kumu ana kaga babu bona'i lu epiluta kapo hokolo hu letalibe lite loka halo. Nanimoya yatai ana ka lamana'a lu yege hose'na'mu naga'i li'ohuna yabe. 4 To nani kumu yabe lite ana kaga lu yege hoto lu epilenogo keheli fe lilabe luto loka halo. Hu'mau nani'i anana'mu noho lifi'ehigo ya'ma lili'na nani'ni lusiga lilube.

5 Enali Kilisitohi naga'i menehana bona'magihi fulu hite kehelilete bebe sana hapa'a hi epalalo. Ya hite, asaga yupahi ka lamana'a lu epise'namofihi kapo'a sa sa hite mone fa'mene meminese enehe'mete Yesuhi hapa'a enelepilo. 6 To lenali kaga nelanaya ka laga'a hiti fulu'a hiti lite neminenogomo enali ka kehelilabe. To enali mone kaga lenoloka nehenogomo ka'anilo nona'a bati hite aku'i lu epilabe lite kehelilo.

Anasi su halina ka

7 Lalalutifu mone gi'a Tikiku nani lenalitoga ho lifilube. Ai ana huto Sipi Botimofihi lili'na bo nohuto kosele'i mehose nehe'molata nohina yabe. Ai lenalitoga buto lali kumu lu lepilenogo kehelilete komopatini keta holatana'mu babahi huto higo lenali lenegelo bilabe. 9 To lenali bonatini mone gi'a Onesimasi loe hiti bila'ibe. Onesimasiu ana huto lalalutifu nohuto kosele'i mehose Hu'mamofihi lili'na bo'a lagati lebesina bo nohibe. Ana loe bole lenalitoga bilete ma hepatoga huto nohinana'a asaga'i lu lepila'ibe.

10 To mone bouba gi'a Alisataku nani hiti'i naga'i li'ehina bouba lenali kumu nehafihe luto noligo fayahi nokoyobe. To ana huto Makiu, Banabasihi etali'afihi pana'a, ai lenali kumu nolibe. Nani ai kumu alu lepi'ohunagi to lenalitoga nehetilenogomo be tigite le'malo. 11 To Yosua mone gi'a Yasatasi ai ana huto lenali kumu nolibe. Enali ya'ma loebe monebe bona'magi enaligo Yuta bona kegi'agati ete Hu'mamofihi kapo'a lili'nalo nehe'mete neminabe. Enali amuya melete nehe'melatanamo sipi'a ni'ibe.

12 To lenali bonatini mone gi'a Epafalasi ai Yesu Kilisitohi lili'na bo'a lolo hu'ehina bouba ana huto lenali kumu nehafiye luto nolibe. Ai asaga kanagu lenali Hu'mamofitoga loe lae mehise ule'ale hite minete agoya hi emite minalabe luto nunumu huto amuya moloto Hu'mamofihi loka hoto nominabe. 13 Ai lenali kumu amuya lili'na nolina bo nohigo bu go'ohuna yabe. To ana huto Leotisia hepato bona kumu hiti Hilapolisi hepato bona kumu amuya moloto lili'namo nolina keheli'ohube. 14 To laga lebesina bo, Luku, ai lusa bo nohina yagi to Temasi ana hite lenali kumu nehafiye lite nela'igo nogobe.

15 To lenali Leotisia bonatoga enebe tigite ka'ni lu epilo. To mone a'mo, gi'a Nifa aitoga to Yesuhi naga'i ai'a nonugu li gehesa nehana bonatoga ana hite enebe tigite ka'ni lu epilo. 16 To lenali ya'ma fayapo leka se su helete Leotisia bonatoga epinogo enali li nupa hite leka salabe. To ana'mu enali fayahi koyo epolo'ohunana lepinogo lenali leka salo. 17 To mone bo, Akipasi, ma lite lu emilo: Sipi Botiu kimi'ehina lili'na yamofihi mehe'mise li baga ibo.

18 Nani Poluita nani'ni nayaha'nitu fayahi koyoto ma luto nolepube. Nalalu'nigita nehafiye? Nani ya'ma noluto to naga'i li'ohunaya lenekesu meheno. Hu'mamofihi lenehe'mose'nauba lenalitoga mino moloto mineno.